سينما

المشاركات

عرض المشاركات من ديسمبر, 2007

صباح الخير

لما تبقي تايه في الاماكن من يوم ما وعيت ع الدنيا ومش قادر تستوعب وصف الطريق للبيت او الشغل ..ولما تبقي مش عارف معني السكن في المكان .. ولما تبقي بتطارد روحك وهي هربانة منك ..وانت وهي مش عارفين لفين يبقي الحل الوحيد انك تسكن هنا في الحاجات اللي مش ممكن تتهد ولا تتلمس ..تتشاف بس ..وممكن حد يمصمص شفايفه بعد ما يشوفها وحد تاني يعدي وما يشوفش خالص ..وممكن تسكن جوه عيون أو قلب وتبقي برضه حر وغرقان في التوهه لأنك مجرد كلام مكتوب في الهوا ..كده الواحد مش ماشي جنب الحيط ولا جوه الحيط .. كده الواحد مش هنا .. ولا هناك .

من تاني

هو لازم يبقي في العالم مدن قبيحة وكتل أسمنت خانقة الناس ..هو لازم يبقي في صراصير وأفاعي وفيران بتخلينا قرفانين وقلقانين ..هو لازم يعني نقع في غلطات لا يمكن علاجها طيب ليه ..ليه من الاول ما نتولدش كبار وحكماء وعارفين نفسنا ..ليه نبقي عامين زي المسافات اللي بنقطعها وتفوتنا أعمارنا وما نقدرش نرجع ناخدها معانا بصراحة انا عايز أرجع عيل بجد مش عيل بشعر أبيض ..عايز أرجع أقعد علي قهوة المحطة وأروح البحر من ورا أهلي اللي خايفين طول عمرهم اني أغرق فخلوني غرقان في الخوف من البحر مع ان موجه أصدق تعبير عن حال الدنيا

هو لازم نغلط نص عمرنا ونعيش النص التاني نندم ع الغلط